Styret i det nye lokallaget for Vindafjord og Etne.
Dermed har også Vindafjord og Etne fått ei lokal stemme som skal tala naturen si sak. Heile 16 personar møtte opp på stiftingsmøtet som føregjekk i Ølen Sanitetslag sitt lokale i Ølen onsdag kveld. Fylkessekretæren for Naturvernforbundet i Rogaland, Gaute Henriksen, geleida dei mange frammøte medlemmene gjennom det formelle som må til for å starta eit lokallag.
Det er til saman rundt 50 medlemmer i Etne og Vindafjord, og då var det imponerande at heile 16 av dei kom på stiftingsmøtet. Det vitnar om stort engasjement for naturvern i dei to kommunane, som ligg i Rogaland og Vestland fylke. Det er ikkje kvar dag det blir stifta lokallag over ei fylkesgrense.
Til styret for det nye lokallaget blei desse valde: Halldis Furre (leiar), Silje Sælen-Helgesson (kasserar), Grethe Tesdal (styremedlem), Gunvor Tesdal (styremedlem) og Linda Skaar (styremedlem). Styret er eit interimstyre som vil fungera fram til årsmøtet på nyåret. Førebels er det bare kvinner i styret, men det er håp om betre kjønnsfordeling når det blir styreval på årsmøtet.
